O'zbekiston Respublikasi Soliq qo'mitasi huzuridagi Soliq oliy maktab

Soliq oliy maktabi haqida

Soliq oliy maktabi O‘zbekiston Respublikasi Prezidentining 2026-yil 19-maydagi PF-95-sonli Farmoni asosida tashkil etilgan bo‘lib, soliq tizimi va iqtisodiyotning boshqa tarmoqlari uchun zamonaviy bilim va amaliy ko‘nikmalarga ega malakali mutaxassislarni tayyorlashni o‘z oldiga maqsad qilib qo‘ygan.

Soliq oliy maktabi soliq tizimi uchun kadrlar tayyorlaydigan tayanch oliy ta’lim muassasasi hisoblanadi.

2026/2027-o‘quv yilidan boshlab bakalavriatning quyidagi ta’lim yo‘nalishlari bo‘yicha qabul amalga oshirildi:

• Soliqlar va soliqqa tortish;

• Buxgalteriya hisobi.

Shuningdek, istiqbolda quyidagi yangi ta’lim yo‘nalishlarini joriy etish rejalashtirilgan:

• Raqamli soliq ma’murchiligi;

• Soliq huquqi va moliyaviy nazorat.

Oliy maktabda ta’lim jarayoni yuqori malakali xorijiy va mahalliy professor-o‘qituvchilar hamda amaliyotchi mutaxassislar ishtirokida tashkil etiladi.

Talabalar uchun zamonaviy o‘quv binolari, Axborot-resurs markazi, sport zali, stadion hamda 1 000 o‘rinli talabalar turar joyi kabi zarur sharoitlar yaratilgan.

Soliq oliy maktabi — bu nafaqat oliy ta’lim muassasasi, balki kelajakda soliq tizimi va iqtisodiyotning turli tarmoqlarida faoliyat yuritadigan professional mutaxassislar maktabidir.

Xalqaro talabalar uchun yaratilgan sharoitlar
1. Qabul jarayoni
Xalqaro talabalar uchun qabul jarayoni aniq va tushunarli tartibda tashkil etilgan. Talabalarga hujjatlarni topshirish, ta’lim yo‘nalishini tanlash va qabul talablariga oid ma’lumotlar taqdim etilib, zarur maslahat yordami ko‘rsatiladi.
2. Yo‘nalish dasturi
Xalqaro talabalar tanlagan ta’lim yo‘nalishlari bo‘yicha o‘quv dasturlari, fanlar mazmuni va baholash mezonlari bilan tanishish imkoniyatiga ega. Ta’lim jarayoni talabalarning kasbiy bilimlari va amaliy ko‘nikmalarini rivojlantirishga yo‘naltirilgan.
3. Tilni qo‘llab-quvvatlash
Xalqaro talabalarning ta’lim jarayoniga samarali moslashishi uchun tilni o‘rganish va muloqot ko‘nikmalarini rivojlantirishga ko‘mak beriladi. Talabalar o‘zbek va rus tillaridagi kundalik hamda akademik muloqot ko‘nikmalarini mustahkamlash imkoniyatiga ega.
4. Madaniy integratsiya
Xalqaro talabalarni O‘zbekistonning milliy qadriyatlari, tarixi va madaniyati bilan tanishtirishga alohida e’tibor qaratiladi. Madaniy tadbirlar, uchrashuvlar va jamoaviy faoliyatlar orqali xorijiy hamda mahalliy talabalar o‘rtasida do‘stona munosabatlar rivojlantiriladi.
5. Uy-joy yordami
Xalqaro talabalarga yashash joyini topish va turar joy sharoitlari bilan tanishishda zarur ma’lumot va maslahatlar taqdim etiladi. Talabalarning yashash sharoitlariga moslashishi hamda qulay turar joy masalalarini hal etishiga ko‘maklashiladi.
6. Akademik yordam
Xalqaro talabalarni o‘quv jarayonida qo‘llab-quvvatlash, fanlarni o‘zlashtirish va akademik natijalarini yaxshilashga yordam berish tizimi yo‘lga qo‘yilgan. Talabalar o‘qish davomida yuzaga keladigan savollar bo‘yicha professor-o‘qituvchilar va mas’ul xodimlardan maslahat olishlari mumkin.
7. Huquqiy yordam
Xalqaro talabalarga O‘zbekistonda ta’lim olish, yashash va tegishli hujjatlarni rasmiylashtirish bilan bog‘liq masalalar yuzasidan tushuntirishlar beriladi. Zarur hollarda talabalar tegishli vakolatli tashkilotlarga murojaat qilish tartibi bo‘yicha yo‘naltiriladi.
8. Ijtimoiy va hissiy qo‘llab-quvvatlash
Xalqaro talabalarning yangi muhitga moslashishi, jamoaga qo‘shilishi va ta’lim jarayonida o‘zini erkin his etishiga ko‘mak beriladi. Talabalar o‘rtasida o‘zaro hurmat, hamjihatlik va do‘stona munosabatlarni rivojlantirishga qaratilgan qo‘llab-quvvatlash muhiti shakllantirilgan.
9. Turli xillilik va inklyuziya tashabbuslari
Oliy maktabda turli millat va madaniyat vakillariga hurmat bilan munosabatda bo‘lish, teng imkoniyatlarni ta’minlash hamda o‘zaro tushunishni rivojlantirishga e’tibor qaratiladi. Har bir talabaning ta’lim jarayonida faol ishtirok etishi va o‘z salohiyatini namoyon qilishi uchun inklyuziv muhitni rivojlantirishga qaratilgan ishlar olib boriladi.
10. Qayta aloqa mexanizmi
Xalqaro talabalarning fikr-mulohazalari, takliflari va murojaatlarini o‘rganishga qaratilgan qayta aloqa mexanizmi mavjud. Talabalarning ehtiyojlarini aniqlash va ta’lim hamda xizmatlar sifatini yaxshilash maqsadida ularning fikrlari inobatga olinadi.

Xalqaro hamkorlik

Xalqaro hamkorlik Soliq oliy maktabi faoliyatini rivojlantirishning istiqbolli yo‘nalishlaridan biri hisoblanadi. Ushbu yo‘nalish xorijiy ta’lim va ilmiy tashkilotlar bilan hamkorlik aloqalarini kengaytirish, soliq sohasi uchun kadrlar tayyorlash borasida tajriba almashish, akademik mobillikni rivojlantirish, qo‘shma ta’limiy hamda ilmiy-amaliy tadbirlarni tashkil etish, shuningdek, soliq ma’murchiligiga oid xalqaro yondashuvlarni o‘rganishni nazarda tutadi.

Xalqaro aloqalarni rivojlantirish yo‘lidagi muhim qadamlardan biri 2026-yil 10-sentabr kuni O‘zbekiston Respublikasi Soliq qo‘mitasi huzuridagi Soliq oliy maktabi hamda Rossiya Federal soliq xizmati «Liderlik va biznes-jarayonlarni boshqarish akademiyasi» qo‘shimcha kasbiy ta’lim federal davlat budjet ta’lim muassasasi (FNS LAB akademiyasi) o‘rtasida hamkorlik to‘g‘risidagi memorandumning imzolanishi bo‘ldi.

Mazkur memorandum soliqqa tortish va soliq ma’murchiligi sohalarida mutaxassislarni tayyorlash, qayta tayyorlash hamda ularning malakasini oshirish, shuningdek, tomonlar o‘rtasidagi ilmiy va kasbiy hamkorlikni kengaytirishga qaratilgan.

Hujjatga muvofiq, hamkorlikning asosiy yo‘nalishlari quyidagilardan iborat:

• qo‘shma ilmiy tadqiqotlar, konferensiyalar, forumlar, davra suhbatlari, seminarlar va boshqa tadbirlarni tashkil etish hamda o‘tkazish;

• ilmiy-uslubiy materiallar, nashrlar va axborot resurslari bilan almashish;

• qo‘shma ta’lim dasturlari, malaka oshirish kurslari va kasbiy qayta tayyorlash dasturlarini ishlab chiqish hamda amalga oshirish;

• professor-o‘qituvchilar, ilmiy xodimlar va mutaxassislar uchun stajirovkalar, akademik almashinuvlar hamda tashriflarni tashkil etish;

• soliq organlari faoliyatini raqamli transformatsiya qilish va zamonaviy ta’lim texnologiyalarini qo‘llash borasida tajriba almashish;

• qo‘shma nashrlar, tahliliy materiallar va ilmiy tadqiqotlarni tayyorlash.

Bundan tashqari, Soliq oliy maktabining xalqaro aloqalarini kengaytirish doirasida Shanxay biznes maktabi (Shanghai Business School) bilan hamkorlik to‘g‘risidagi kelishuvni tuzish rejalashtirilgan. Xitoyning mazkur ta’lim muassasasi bilan hamkorlik tajriba almashish, xalqaro ta’lim amaliyotlarini o‘rganish, shuningdek, iqtisodiyot, moliya va soliq ma’murchiligi sohalarida kasbiy kompetensiyalarni rivojlantirish imkoniyatlarini kengaytirishga xizmat qilishi kutilmoqda.

Xalqaro hamkorlikni rivojlantirish ta’lim dasturlarini takomillashtirish, ilmiy salohiyatni mustahkamlash, kasbiy ta’limning zamonaviy usullarini joriy etish hamda xorijiy hamkorlar bilan amaliy aloqalarni kengaytirishga xizmat qiladi.

Rivojlanish istiqbollari

Soliq oliy maktabi akademik bilimlar, amaliy tajriba va malakali kadrlar tayyorlashga oid xalqaro yondashuvlarni o‘zida mujassam etgan zamonaviy ta’lim hamda ilmiy-amaliy markazga aylanishni maqsad qilgan.

Institutsional asoslarni izchil rivojlantirish, ta’lim dasturlarini takomillashtirish, raqamli yechimlarni joriy etish va xalqaro hamkorlikni kengaytirish mutaxassislar tayyorlash sifatini yanada oshirish hamda O‘zbekiston Respublikasi soliq organlarining kadrlar salohiyatini rivojlantirish uchun mustahkam zamin yaratadi.

Soliq oliy maktabi faoliyati zamonaviy soliq tizimi oldida turgan vazifalarni samarali hal eta oladigan, ilg‘or texnologiyalarni qo‘llaydigan va O‘zbekiston Respublikasida soliq ma’murchiligini takomillashtirishga munosib hissa qo‘shadigan mutaxassislarning professional hamjamiyatini shakllantirishga qaratilgan.

FEEWFewfwefwef